Sunday, April 3, 2011

الداخلية و الزمالك

الثورة المضادة تاني ...
ماتش كورة باظ عشان الجمهور اقتحم الملعب تاني تبقى ثورة مضادة.
في سيناريوهين للي حصل النهردة, يا إما الجمهور المتعصب عمل كده من نفسه , يا إما فعلا كان في مؤامرة.

الإختيار الاول إن الجمهور عمل كده من نفسه,ليه؟ حد هيقولي استحالة الزمالك كان كسبان. أيوه كان كسبان بس النتيجة دي مكنتش تعديه للدور اللي بعده.
آه إبراهيم حسن كان قال تصريحات يسخن الناس إنها تنزل بعد ماتش الذهاب في تونس بس ماظنش إن ده سبب مقنع برضو.

السيناريو التاني و ده اللي قريب للناس كلها أو بمعنى أصح الناس كلها نفسها تصدقه إن كل ده كان متدبر. يعني الناس بتقول إن الأبواب اتفتحت لوحدها عشان كده الناس نزلت و إن ده مش شكل الجمهور اللي بيروح الماتشات كلها ودول ناس دخلاء و مندسين.
عامة بصفتي بروح الاستاد كتير فـأنا احب أؤكد إن الأشكال دي شكلها عادي جدا (أبو جلابية أو غيره) و بنشوفها هناك كتير لكن طبعا مش بسلاح عشان بيتفتشوا.

الاسئلة بقى اللي أنا مش عرف اجابتها, اشمعنى ده حصل في ماتش الزمالك محصلش في ماتش الأهلي أو ماتش الاسماعيلي اللي كانوا في مصر هنا من اسبوعين؟ و لو كان "الثورة المضادة" عندها القدرة إنها تحشد الناس دي كلها ليه مش بينزلهم مظاهرات مصطفى محمود بدل ما العدد اللي بتنزل هناك بيبقى شكلها يكسف؟

أولا احب اوضح حاجة,اللي حصل النهردة ده تقصير من الجميع. تقصير من الجمهور نفسه; كل واحد يطلع في التلفزيون يقولك ده في ناس هناك من الساعة 10 الصبح بسنج ومطاوي ,طب طالما أنتم عرفين مبلغتوش ليه؟؟. تقصر من أصحاب العقول و الاغلبية الواعية -طالما اللي نزلوا قلة غير واعية- إنهم لما شافوا الأبواب بتتفتح سابوا التانين ينزلوا و مامنعوهمش. ماهو مش معنى إن الباب اتفتح إنها زيطة بقي كله ينزل.
الأهم بقي إن التقصير من الشرطة ,أيوه تقصير في كل حاجة . الناس كانوا فرحانين انهم  بقوا بيدخلوا الستاد من غير ما يتفتشوا , اهي النتيجة اهي. مينفعش الاسلوب اللي الشرطة بتتعامل بيه مع الناس ده , ما هو مش عشان "اتصالح" مع الناس يبقى اسيبهم بـمزاجهم و مفتش حد ولا اخد مخالفات . لا معلش التصالح بجد إنهم يطبقه القانون صح على الناس كلها.
هنا برضو بييجي دور الناس , كل واحد دلوقتي بيطلعله عسكري ولا آمين في الشارع الناس بـتتنك عليه و يقولوله كنتوا فين من يوم 28 .
العقيد المسئول عن الماتش قال احنا مافتشناش الناس عشان حقوق الإنسان بتاعة الثورة, هم هيذلونا يعني ولا إيه ؟ و لو الأبواب اتفتحت فعلا كنتوا فين بقي وهم بيتفتحو ولا أنتم بقى اللي اديتوا الاوامر؟

الخلاصة إن اسلوب الداخلية في التعامل مع كل حاجة غلط في غلط , واضح إن الوزير ده يا اما ملوش كلمة عرف يمشيها على اللي تحته فا بيحصل كده يا اما هي دي سياسته فا يبقي في الحالتين لازم يستقيل حالا.
و الخلاصة إن الناس مش حتستريح غير إن يطلع دي مؤامرة وياريت كمان تكون من فلول النظام و ده احتمال كبير إن يشيلهم الليلة حتى لو مش هم اللي عملها بجد عشان يهدوا الرأي العام و هتبقي الحقيقة دايما غير معروفة.

الحق إن اعتذار الحكومة لوحده مش كفاية , و زي ماكل الناس قامت وماقعدتش على شفيق بعد موقعة الجمل لازم نطالب بـتحقيق حقيقي  عشان الحق حق بغض النظر احنا اللي جايبين الحكومة الحالية وهم مننا ولا لأ.

رأيي لغاية ما يبقي في أمن مينفعش تتلعب ماتشات كورة أو أي تجمعات بالعدد ده. لكن إن الدوري يمكل من غير جماهير ده كلام ملوش معنا, ماهو الحجة إن عشان الأندية ماتفلسش طب ما لو من غير جمهور هيجيبوا فلوس منين؟

تبقي فقط في كل مايحدث حقيقة واحدة, إن دايما الزمالك و الاسماعيلي فاضحين مصر ومجرسنها و الأهلي هو اللي رفع راسها.

3 comments:

  1. mohamed abdelatifApril 3, 2011 at 2:10 AM

    ya gohary elmatch kan been faree2 masri w faree2 tunsy w nafs el el3ba eli beyel3aboha m3 el moslemeen wel mese7eyeen hayel3aboha been el 3arab w b3d w methaya2li el mawdoo3 msh me7tag tafseer la2en da nafs el esloob eli otaba3 m3ana men sa3et mal rayyes meshy 3amaleen ye2asemoonah we7na benet2asem zyel fol msh me7tageen...

    ReplyDelete
  2. anamen el 7ezb el watany ba3taref eno alyy el din helal 7arradna 3ala efsad el match we e7na el 7arradna 7akam el raya eno ye7seb el goal offside , we hossam we ibrahim moshtarekeen ma3ana we akhadna tadrebna fe mal3ab nady el shorta en e7na nefta7 el abwab we nenzel negeeb asle7a men yofat el e3lamanta

    2onshor ya demoqraty ya mo7ayed

    ReplyDelete
  3. ahly rafe3 ras masr, atleast much more than any other .

    ReplyDelete