الجيش و الشعب و الحكومة صباع واحد

الجيش

الجيش لا بيتعامل مع الموضوع بطريقة عسكرية ولا بطريقة سياسية, هو تقريبا مش بيتعامل مع الموقف أصلا. بعيدا عن كلام الاخ عمر عفيفي و"العناصر الخارجية" أكيد الجيش فيه فساد زي ما كل حاجة تانية في مصر فيها فساد بس كل اللي بيتكلم على الفساد ده مطلعلناش دليل واحد على كلامه . الجيش من سنة 52 بيتمتع بـمزايا رهيبة, سواء لاعضاؤه أو الكيان نفسه; يعني مثلا كل الأرض في مصربتاعة الجيش, وعندك كمان الميزانية اللي محدش يقدر يسأله فيها وكمان المظاريف السرية (بدل الولاء). و كمان عندهم مصانع ومزارع وخطوط إنتاج وحسب احصائية فـإن الجيش بيساهم في 15% من اجمالي الاقتصاد المصري.

أنا مبقولش إن ده حقهم أو مش حقهم, بس طالما أنتم في الحكم فـأنتم عرضة للنقد زيكم زي اللي قبلكم واللي هيجي بعدكم.

خلاصة الموضوع هم مش عايزين يضحوا بـده ,أو على الاقل بـده كله و ممكن يكون ليهم حق في حاجات ومالهمش فيي حاجات تانية.

الجيش وطني على عيني وراسي, والمعلومات (أو الإشاعات) اللي بسمعها عنهم من قبل وبعد الثورة كتير قوي منها بيأكد على وطنية الجيش وعدم تواطؤه عشان مصلحة مصر.

لكن....لما ييجي الموضوع لإدارة بلد مينفعش كده, المجلس الأعلى بصفته القائم بـأعمل رئيس الجمهورية لازم أولا يحكم سيطرته على البلد, ثانيا لازم يبقى ليه سياسة واضحة حتى لو أعد لفترة مؤقتا انتقالية,ثالثا لازم يبقى في شفافية في اتخاذ القرار وفي كل حاجة رابعا لازم يشرك الشعب معاه ويحسسهم إن الكلمة اللي اتفلقنا بيها من أول يوم "الجيش والشعب إيد واحدة" حقيقية مش بس شعرات وإن في الحقيقة الجيش بيعمل اللي هو عيزه وعايز الشعب يبقى هو ايده.

يعني مثلا إيه لازمة المحاكمة العسكرية للمدنيين؟ و إيه لازمة بالونات الإختبار اللي كل يوم والتاني يسربوها بعدين بعد ما يجسوا نبض الناس يغيروا رأيهم. و إيه فكرة انهم مبيكلمش الشعب وبيكتفوا كل كام يوم بـبيان على فيسبوك مع العلم إن 80 مليون مصري معنهمش انترنت أصلا وأقل من نص العدد ده بشوية مبيعرفش يقرا أصلا.

و إيه لازمة القوانين الغريبة اللي بتطلع كل يوم والتاني دي حتى بعد ماعمله إعلان دستوري مؤقت, ويجوا يعملوا حوار مجتمعي (اللي هو ملوش لازمة أصلا ) بعد مايطلعوا القانون!

ليه الحجر على حرية الإعلام؟ احنا بنتقدم ولا بنتأخر؟

يعني إيه كل يوم التاني تعيدوا وتزيدوا إن الجيش في مصر معملش زي ليبيا واخد صف الشعب ومضربهوش...ما دي وظيفة الجيش يا سادة يا افاضل , أنتم معملتش غير الواجب وتشكروا عليه لكم ماتزلوناش بقي.

الأهم يا مجلس العسكر يا بتوع الدراسات و الإستراتيجيات ليه كل قراراتكم رد فعل مش فعل؟ ليه لازم تحصل مصيبة عشان تتحركوا؟

وحياة ابوكم البلد مش ناقصة.

الحكومة 

"من النهردة مفيش حكومة" ده حال مصر فعلا, ممكن حد يقولي إنجازات الحكومة دي إيه؟ لو سمحتوا محدش يقولي راح اثيوبيا ماحمدين صباحي راح اثيوبيا, راح سيناء وقنا .. ها عمل إيه بقي؟ كل يوم اعتصام و قطع طريق ومظاهرة.

و كل القوانين المشبوهة خرجت تحت وزارته, من قانون الانتخابات لقانون الاعتصامات للقانون المزمع اللي هيصلحوا فيه رجال الاعمال. طبعا هيجي حد يقولي ده مش ذنبه, لا ذنبه حتى لو هو ملوش دعوة بس سياسيا هو مسئول عن كل اللي بيحصل في البلد.

مش هننسى كمان الانفلات الامني اللي متحلش لحد النهردة, طبعا لو واحد عنده دم كان زمانه استقال لكن نقول إيه, العيسوي و شرف وكلهم زيهم زي اللي قبلهم, مفيش حد بيعترف بالمسئولية. و في كمان المحكمة اللي اعتقد مش محتاجة كلام عنها وعن اللي بيحصل.

لو حد بيفكر إن ده مش ذنبهم, يبقى يراجع شفيق مشي ليه..عشان نفس الأسباب ولسة الوضع هو هو.

الشعب 

الناس, الناس هي اللي عملت الثورة, وهي اللي ممكن برضو إنها تبوظها.

الناس اللي كانوا متحضرين وعلى قلب رَجل واحد على مدى 18 يوم فجأة بقت بالنسبة ليهم الثورة هي إنهم يدهنوا الرصيف. لكن ييجي لما حد يقولهم الوضع وحش ومش هنتقدم غير لما نشتغل كله يعمل عبيط و يقولك دي فزاعة.

الناس اللي اتحولوا إنهم يطلعوا إشاعات و يصدقوها, زي إشاعات إن  مبارك هيعتذر  اللي كله نفاها نزلوا يعملوا مظاهرة عشان يرفضه  الإعتذار اللي هو محصلش أصلا ومحدش قال إنه هيوافق عليه عشان نعمله مظاهرة.

الناس اللي لما بتسمع خبر من طنطاوي يبقى بيخوفنا لكن لما البرادعي يقول نفس الخبر يبقى احنا فعلا في مشكلة اقتصادية.

الناس اللي فكرين إن هم اغلبية وقعدين على تويتتر و مش حاسين أو مستعلين على 80 مليون واحد بره تويتتر ليهم مطالب وأراء تانية.

الناس اللي اتخلصوا من ديكتاتورية مبارك عشان يفرضوا هم رأيهم ومش عايزين يسمعوا  الرأي الاخر.

الناس اللي بيعملوا من أي حد ليه رأي تاني عدو و بنخون أي حد.

الناس اللي حولوا المظاهرة من وسيلة للتعبير عن الرأي لمهنة.

رغم كل ده, برضو الأمل الوحيد في البلد في الناس دي, بس ده دور النخبة الواعية إن يبقى ليها صوت وتقود وراها الناس اللي كان ليهم حظ اقل في التعليم أو الوعي, مصر محتجالهم دلوقتي أكتر من أي وقت.

وحياة ابوكم, البلد مش ناقصة,

بلدنا تستاهل أحسن من كده.

من الآخر , الجيش والشعب مش إيد واحدة,, الجيش والشعب و الحكومة صباع واحد وكلهم ب****صوا البلد.